Бишкек, 01.07.26. /Кабар/. Кыргыздын чыгаан уулу, белгилүү актер жана сүрөтчү Сүймөнкул Чокморов туулуп-өскөн үй, анын өнөрканасы жана короо-жайы эл аралык деңгээлдеги музейге айланат. Бул тууралуу мамлекеттик катчы Арслан Койчиев социалдык тармактагы баракчасына жазды.
Анын айтымында, улуу инсандын тарыхый үйү узак жылдар бою каралбай, кароосуз абалда калган.
"Кыргыздын чыгаан уулу Сүймөнкул Чокморов туулуп-өскөн үй, өнөрканасы жана короосу канча жылдан бери каралбай, чөп-тикенек басып, кор болуп жаткан", - деп жазды мамлекеттик катчы.
Койчиев белгилегендей, буга байланыштуу президент Садыр Жапаров тез арада аталган аймакты иретке келтирүү, капиталдык оңдоп-түзөө иштерин жүргүзүү жана бул жайды эл аралык деңгээлдеги музейге айлантуу боюнча тиешелүү жетекчилерге тапшырмаларды берди.
