Бишкек, 14.07.26. /Кабар/. Энергетика министри Алтынбек Рысбеков Boston Consulting Group (BCG) компаниясынын өкүлдөрү менен жолукту.
Ведомстводон маалымдашкандай, жолугушууга BCG компаниясынын директору жана өнөктөшү Игорь Алексеев, ошондой эле компаниянын өкүлү Андрей Лукьянов катышты.
BCG өкүлдөрү энергетика тармагындагы ири долбоорлорду ишке ашырууда жана аларды коштоодо топтогон эл аралык тажрыйбасы менен бөлүштү. Өзгөчө көңүл дүйнөлүк деңгээлдеги инфраструктуралык долбоорлорду натыйжалуу ишке ашыруу жана энергетика тармагын башкаруунун заманбап ыкмаларына бурулду.
Тараптар Кыргызстандын энергетика тармагындагы капиталдык долбоорлорду коштоп жүрүү, тармакты модернизациялоо жана алдыңкы эл аралык тажрыйбаларды колдонуу боюнча кызматташуунун мүмкүн болгон багыттарын талкуулашты.
Алтынбек Рысбеков энергетика өлкөнүн өнүгүүсүнүн негизги багыттарынын бири экенин баса белгиледи.
"Бүгүн Кыргызстанда энергетикалык инфраструктураны жаңылоо, жаңы генерациялык кубаттуулуктарды куруу, электр тармактарын өнүктүрүү жана энергия менен камсыздоонун ишенимдүүлүгүн арттыруу боюнча масштабдуу иштер жүрүп жатат. Биз үчүн стратегиялык долбоорлорду ийгиликтүү ишке ашырууда мыкты тажрыйбаларын өздөштүрүү жана колдонуу абдан маанилүү", – деди министр.
Соңунда тараптар энергетика тармагындагы артыкчылыктуу долбоорлорду ишке ашырууда өз ара диалогду улантууга жана кызматташуунун жаңы мүмкүнчүлүктөрүн кароого даяр экенин билдиришти.
