Бишкек, 24.01.26. /Кабар/. Базар-Коргон районунда “АгроЗооВет–2026” окуу кербенинин алкагында окутуу семинары өткөрүлдү. Бул тууралуу Суу ресурстары, айыл чарба жана кайра иштетүү өнөр жайы министрлигинен кабарлашты.
Ведомствонун маалыматына ылайык, иш-чара дыйкан-фермерлердин жана айыл чарба тармагындагы адистердин билим деңгээлин жогорулатуу, заманбап агротехнологияларды жайылтуу, ошондой эле тармактагы актуалдуу маселелер боюнча кеңири маалымат берүү максатын көздөйт.
Семинардын жүрүшүндө адистер тарабынан мал чарбачылыгын өнүктүрүү, ветеринария тармагын жакшыртуу, тоют базасын чыңдоо, мамлекеттик колдоо механизмдери жана каржылоо мүмкүнчүлүктөрү боюнча кеп-кеңештер айтылды.
