Бишкек, 11.02.26. /Кабар/. Бүгүн Базар-Коргон районунун Сайдыкум айыл аймагына жаңы административдик имарат курулуп, пайдаланууга берилди. Бул тууралуу президенттин Жалал-Абад облусундагы өкүлчүлүгүнөн билдиришти.
Эки кабаттуу имарат республикалык бюджеттен каржыланып, ага 43 млн 288 миң сом каражат жумшалган. Жалпы аянты 700 чарчы метрди түзгөн имарат заманбап талаптарга ылайык салынып, бардык керетүү жабдыктар менен камсыздалган.
Иш-чарага катышкан президенттин өкүлү Тилек Текебаев жаңы заманбап имарат кызматкерлердин натыйжалуу иш алып баруусуна шарт түзүп, калкка көрсөтүлүүчү кызматтардын сапатын жогорулатууга өбөлгө болорун белгиледи.
Ошондой эле имарат айылдын гана эмес, жалпы райондун ар тараптуу өнүгүүсүнө түрткү берерин кошумчалады.
