Бишкек, 07.04.25. /Кабар/. Баткендик ойлоп табуучулардын мыкты эмгектери Кыргызпатенттин колдоосу менен рынокко чыкты. Бул тууралуу президенттин Баткен облусундагы өкүлчүлүгүнөн билдиришти.
Маалыматка ылайык, өкүлчүлүктүн аппараты менен Интеллектуалдык менчик жана инновациялар мамлекеттик агенттигинин (Кыргызпатент) биргелешкен аракетинин натыйжасында, 40 райондон 40 демилге долбоорунун алкагында Баткен облусунда өзгөчөлөнгөн эмгектер каржыланды.
Долбоорлордун авторлору Кыргызпатент тарабынан 500 миң сомдон 1 млн сомго чейинки суммада кайтарымсыз каражат( грант) алышкан.
Алар:
1.“Акылдуу тамчылатып сугаруу долбоору”, Кадамжай району.
2. “Жаңы ыкма менен даярдалган Өрүк курут долбоору”, Баткен району.
3. “Violet gold-лаванда талаасы” самындары, Кадамжай району .
4. “Бал аарычылык чарбасын өнүктүрүү” долбоору, Лейлек району.
5. “Кызыл как” мөмө-жемиш кактары, Кадамжай району.
6. “Сынч Блок Эко 3D панель”, Кадамжай району.
Белгиленгендей, өзгөчөлөнгөн пайдалуу эмгектерди ойлоп табууларга патент алуу боюнча дагы бир катар өтүнмөлөр берилген.
Мындан сырткары, “Баткен өрүгү”, “Актурпак күрүчү” “Лейлек килемдери” боюнча чыгармачылык жана инновациялык ишмердүүлүктү колдоо боюнча иштер жүрүүдө.
Бул багытта бүгүн Кыргызпатенттин өкүлдөрү Баткенге “Билим кербени” менен келип, бардык кызыктар тараптар үчүн окутуу өткөрүштү. Колдоого алынган долбоорлордун ээлери эмгектерин көргөзмөгө коюшту.
