Бишкек, 09.05.26. /Кабар/. Баткен шаарында 9-май — Улуу Жеңиш күнүнө арналган иш-чара өттү. Бул тууралуу өкүлчүлүктөн билдиришти.
Маалыматка ылайык, анда Өчпөс отко гүлчамбар коюлуп, ооруктун ардагерлери жана облус жетекчиси Мамыржан Рахимов баштаган жергиликтүү жетекчилердин катышуусунда Улуу Ата Мекендик согуштун курмандыктары эскерилди.
Андан соң “Өлбөс полк” жүрүшү башталып, ага согуш ардагерлеринин сүрөттөрүн көтөргөн 1500дөй тургун катышты.
Жеңиш майрамына арналган иш-чара Апаз Жайнаков атындагы облустук драма театрынын артисттеринин катышуусундагы сахналаштырылган көрүнүш менен уланып, жергиликтүү таланттардын чыгармалары жаңырды.
Белгиленгендей, Улуу Ата Мекендик согушка Баткен облусунан 21 500 жоокер аттанып, алардын 14 миңи согуштан кайтпай калган. 7 500 жоокер мекенине кайтып келип, согуштан кийинки калыбына келтирүү иштерине активдүү катышкан. Учурда облус аймагында 40 оорук ардагери жашайт.
