Бишкек, 06.09.25. /Кабар/. Баткен шаарында 2023-2027-жылдарга тоолуу региондорду өнүктүрүү боюнча иш-аракеттердин беш жылдыгын ишке ашырууга арналган тегерек стол өттү.
Иш-чара президенттин Тоолуу региондорду өнүктүрүү боюнча иш-аракеттердин беш жылдыгын ишке ашыруу боюнча атайын өкүлү Динара Кемелова тарабынан президенттин Баткен облусундагы өкүлү Айбек Шаменов менен биргеликте өткөрүлдү.
Тегерек столго жергиликтүү бийликтин, эл аралык өнөктөштөрдүн жана жергиликтүү жамааттардын өкүлдөрү тоолуу аймактарды өнүктүрүү, табигый кырсыктардын тобокелдигин азайтуу, климаттын өзгөрүшүнө ыңгайлашуу жана анын кесепеттерин жумшартуу, тоолуу жамааттардын жашоо деңгээлин жогорулатуу жана тийиштүү инфраструктура менен камсыз кылуу боюнча Жол картасын ишке ашыруунун жүрүшүн талкуулоо үчүн катышты.
Баткен облусун өнүктүрүү мүмкүнчүлүктөрүн талкуулоонун алкагында катышуучулар жасалма мөңгүлөрдү түзүү (Баткен облусунда 7 жасалма мөңгү жасалган), сууну үнөмдөөчү заманбап технологияларды колдонуу, анын ичинде облустун бардык үч районунда тамчылатып сугаруу системаларын киргизүү боюнча мисалдар менен бөлүшүштү.
Бул аймактын туристтик мүмкүнчүлүктөрүнө, ошондой эле Кайыңды (алма) жана Зардалы (өрүк, жүгөрү, буудай) сыяктуу органикалык аймактарды өнүктүрүүгө, ошондой эле Баткен өрүгүн жана ак-турпак күрүчүн бренд катары алып чыгууга өзгөчө көңүл бурулду.
Мындан тышкары, тегерек үстөлдүн катышуучулары эл аралык маанидеги геологиялык мурастар көрсөтүлгөн Мадыген жаратылыш геопаркына барышты.
Катышуучулар ошондой эле эл аралык уюмдардын линиясы боюнча тоолуу аймактардагы жергиликтүү жамааттарды колдоонун ийгиликтүү долбоорлору катары кондитердик цехке жана кулпунай өстүрүү боюнча айыл чарба кооперативине барышты.
