Бишкек, 09.04.26. /Кабар/. Баткенде стратегиялык маанидеги Миң-Өрүк – Самаркандек жолу курулууда. Бул тууралуу президенттин Баткен облусундагы өкүлчүлүгү билдирет.
Маалыматка ылайык, облус башчысы Мамыржан Рахимов аталган унаа жолунун курулушунан кабар алды. Рахимов жол куруучулар жана жергиликтүү бийлик өкүлдөрү менен жеринде жолугуп, жолдун сапатына өзгөчө көңүл бурууну жана курулушта жаралган маселелерди ыкчам чечүүнү тапшырды.
Баткен облусунун Тажикстан менен чектеш аймагында, узундугу 3,2 чакырым болгон Миң-Өрүк – Самаркандек унаа жолунун курулушу 2025-жылдын август айында башталган. Долбоор толугу менен мамлекеттик бюджеттен каржыланууда.
Курулуш Транспорт жана коммуникациялар министрлигинин "Кыргызавтожол-түштүк" мамлекеттик ишканасы Кытай мамлекетинин “Хэнань линцзо” жол куруучу компаниясы менен бирге ишке ашырылууда. Курулуш мөөнөтү 3 жыл болуп белгиленген.
Жолдун туурасы 10 метр болуп, асфальт төшөлөт. Долбоор боюнча дарыянын жана жолдун үстүнөн узундугу 266 метр болгон "эстакадалык көпүрөнүн" курулушу каралган. Ошондой эле жол түнкүсүн жарыктандырылат.
Курулуп жаткан жол азыркы пайдаланып жаткан каттамга караганда Лейлекке 3 чакырымга, ал эми Самаркандек айылына 17 чакырымга кыскарат. Бүгүнкү күндө зоону жардырып жол куруу жана көпүрөнүн таянычтарын тургузуу иштери кызуу жүрүп жатат.
Иштин натыйжалуулугу үчүн жеринде бир бетон даярдоочу завод жана бир таш майдалоочу жабдык курулуп, иштеп жатат.
