Бишкек, 23.03.26. /Кабар/. Баткенде ири инфраструктуралык объектилердин курулушу уланууда. Бул тууралуу президенттин Баткен облусундагы өкүлчүлүгүнөн билдиришти.
Бүгүн өкүл Мамыржан Рахимов жана Жогорку Кеңештин депутаты Исманали Жороев Баткен шаарында курулуп жаткан бир катар ири инфраструктуралык объектилердин курулуш иштери менен таанышты.
Алгач алар 10 миң орундуу заманбап стадиондун курулушу менен таанышты. Бул стадион аймактагы спортту өнүктүрүүгө чоң салым кошуп, жаштардын спортко болгон кызыгуусун арттырууга өбөлгө түзмөкчү.
Андан соң Чет-Булак кварталындагы муниципалдык базардын курулушу менен таанышты. Заманбап шарттары бар бул долбоор сооданы иретке келтирүүгө жана аймактын экономикасын көтөрүүгө багытталган.
Ошондой эле МИК тарабынан ишке ашырылып жаткан, калкты жеткиликтүү жана заманбап турак жай менен камсыз кылуучу ири "Асман-1" комплексинин курулушу менен таанышты.
Рахимов бул курулуштарды өз убагында жана сапаттуу бүтүрүү маанилүү экенин айтып, долбоорлор Баткен облусунун социалдык-экономикалык өнүгүүсүнө салым кошуп, аймактын инфраструктурасын жакшыртууда маанилүү роль ойной турганын белгиледи.
