Бишкек, 16.09.25. /Кабар/. Баткен шаарында Советтик армиянын аскерлеринин Афганистан жергесинен чыгарылгандыгынын 36 жылдыгына карата эл аралык иш-чара башталды. Бул тууралуу президенттин аймактагы өкүлчүлүгүнөн билдиришти.
Анда Өзбекстан, Тажикстан мамлекеттеринен Афган согушунун ардагерлери келип, согушта курман болгон баатырлар эскерилди.
Алар Афган согушунун курмандыктарына арналып тургузулган эстеликке гүл коюп, алардын арбагына багыштап куран окушту.
Иш-чаранын расмий бөлүгү Баткен облустук Апаз Жайнаков атындагы облустук драма театрда өттү.
Президенттин облустагы өкүлүнүн орун басары Абдирашит Ташбалтаев катышып, облус башчысы Айбек Шаменовдун куттуктоосун жеткирип, сыйлыктарын тапшырды.
"Кыргызстан, Өзбекстан жана Тажикстандан келген ардагерлердин бүгүнкү жолугушуусу – достуктун, боордоштуктун жана тынчтыкка болгон биргелешкен чакырыктын символу. Бүгүнкү күн – тарыхты эскерүү менен бирге, достукту чыңдоонун күнү", - деди ал.
Белгилей кетсек, алдыда иш-чаранын алкагында ардагерлер спорттун бир канча түрү боюнча мелдешке катышат.
