Бишкек, 01.10.25. /Кабар/. Баткенде Мекеним “1+1” пилоттук программасынын алкагында 11 адам грант алды. Бул тууралуу облустагы өкүлчүлүктөн билдиришти.
Маалыматта белгиленгендей, Эл аралык миграция уюумунун “Борбор Азиядан Улуу Британияга сезондук жумушчулар үчүн коопсуз миграция” долбоору Баткен облусунда пилоттук 1+1 программасы боюнча бизнес баштоо жана кеңейтүү багытында демилгелерди колдоп келет.
Бул багытта аткарылып жаткан иштерди байкоо, демилгелерди өнүктүрүү максатында Баткен шаарында атайын жыйын өтүп, мыкты долбоорлор тандалды.
Ага ылайык, Улуу Британиядагы Сезондук жумушчулар программасы аркылуу иштеп келген Баткендин жашоочуларына, алардын үй-бүлө мүчөлөрүнө жеке бизнесин баштоого же кеңейтүүгө грант берилди.
Буга чейин миграциядан кайткан 27 жаранга грант берилсе, бул ирет 11 адам алды.
Мындай колдоо чет мамлекеттерде миграцияда жүрүп, мекенине кайткан жарандарды туруктуу жумуш орду менен камсыздап, мекенинде киреше табуу менен аймактын социалдык- экономикалык өнүгүүсүнө салым кошуу аракеттерине өбөлгө түзөт.
Өкүлчүлүктүн маалыматына караганда, учурда облустун 37 миңдей тургуну ички жана сырткы миграцияда жүрөт. Мындан улам Эл аралык миграция уюмунун колдоосу менен Баткенде Молдованын мигранттарды мекенине кайтаруу боюнча тажрыйбасы ишке ашырылууда.
