Бишкек, 03.03.26. /Кабар/. Бүгүн эртең менен Баткен шаарында 3-март - Мамлекеттик туу күнү жана 5-март - Ак калпак күнүнө арналган иш чара өттү.
Президенттин Баткен облусундагы өкүлчүлүгүнөн билдиришкендей, ак калпак кийип, колдоруна туу көтөргөн жаштар шаардын борбордук көчөлөрүндө жөө жүрүш жасашты.
Салтанаттын расмий бөлүгүндө облус башчысы Айбек Шаменов жалпы облус калкын куттуктады.
Өкүл өз сөзүндө “мамлекеттик туубуз элибиздин тарыхын, маданиятын жана келечекке болгон ишенимин айгинелеп турат. Ал эми ак калпак ата-бабаларыбыздан калган улуу мурас катары, акылмандыктын, тазалыктын жана намыстын белгиси болуп саналат. Бул майрамдар ар бирибизди мекенчилдикке, биримдикке жана улуттук баалуулуктарды сактоого чакырат. Биз ыйык туубуздун алдында биригип, ак калпагыбызды бийик тутуп, өлкөбүздүн өнүгүшү үчүн талыкпай эмгектене берели” деп белгиледи.
Майрамдык иш-ара жергиликтүү таланттардын ыр-бийлери менен коштолду.
