Бишкек, 23.09.25. /Кабар/. Бүгүн Кызыл-Кыя шаарында 23-сентябрь – Мамлекеттик тил күнүнүн 36 жылдыгына арналган “Эне тилим эчен кылым карыткан” аттуу кароо-сынагы өттү.
Президенттин Баткен облусундагы өкүлчүлүгүнөн билдиришкендей, иш-чарага Мамлекеттик тил жана тил саясаты боюнча улуттук комиссиясынын өкүлү Асылбек Орозов, президенттин Баткен облусундагы ыйгарым укуктуу өкүлүнүн аппаратынын социалдык өнүктүрүү бөлүмүнүн башчысы Кызжибек Тагаева, Кызыл-Кыя шаарынын вице-мэри Иляз Бабаевдер катышты.
Иш-чарада мамлекеттик тилдин коомдогу ордун бекемдөө, аны сактап өнүктүрүү аракеттери тууралуу, тилди өркүндөтүү үчүн ар бир жаран өз салымын кошууга тийиш экендиги белгиленди.
Ошондой эле кароо-сынакка катышкан Кызыл-Кыя шаарындагы жогорку жана кесиптик окуу жайлардын катышуучуларынын эмгектери бааланып, жеңүүчүлөргө Мамлекеттик тил жана тил саясаты боюнча улуттук комиссия жана шаар мэриясынын сыйлыктары тапшырылды.
Мындан тышкары, кол өнөрчүлөрдүн көргөзмөсү менен тааныштырылып, маданият үйүнүн кызматкерлеринин концерти тартууланды.
