Бишкек, 03.10.25. /Кабар/. Баткенде мамлекеттик кызматкерлердин кызматтык жана конок үйү жаңыланууда. Бул тууралуу президенттин аймактагы өкүлчүлүгүнөн билдиришти.
Маалыматка ылайык, Баткен шаарындагы мамлекеттик кызматкерлердин 32 батирлүү кызматтык үйү капиталдык оңдоп түзөөдөн өтүүдө. Алдыда кызматтык үйдүн алдына асфальт төшөлүп, айланасы көрктөндүрүлөт. Балдар ойноочу аянтчалар да курулат.
Мындан сырткары, Төрт-Гүл суу сактагычынын жээгинде жайгашкан конок үйү да капиталдык оңдоп-түзөөдөн өтүп, коноктор үчүн заманбап шарттар түзүлүүдө. Курулуштар республикалык бюджеттен каржыланууда.
Президенттин өкүлүнүн биринчи орун басары Бактыбек Токсонбаев курулуш иштеринен кабар алып, курулуштун сапатына өзгөчө көңүл буруп, мөөнөтүндө бүткөрүүнү тийиштүү жетекчилерге тапшырды.
