Бишкек, 23.05.26. /Кабар/. Баткен облусунун Кадамжай шаарында “Кыялымдагы Кыргызстан: Жаштардын достугу, ынтымагы жана кызматташтыгы” аттуу эл аралык туристтик форум-фестивалы өтүүдө. Бул тууралуу президенттин Баткен облусундагы өкүлчүлүгүнөн билдиришти.
Иш-чара Кадамжай шаарындагы туу көтөрүү аземи менен башталды. Ага президенттин Баткен облусундагы ыйгарым укуктуу өкүлү Мамыржан Рахимов, Кадамжай районунун акими Болоткан Баяке уулу жана өлкө аймагынан келген 100 жаш лидер катышты.
Андан соң расмий делегация борбордук стадиондо Өзбекстан жана Тажикстандан келген коноктор менен бирге IV Килем фестивалы, кол өнөрчүлөрдүн көргөзмөсү жана жергиликтүү өндүрүүчүлөрдүн продукцияларынын жарманкеси менен таанышышты. Ошондой эле жаш ойлоп табуучулардын “Технофест” иш-чарасына катышышты.
Форумдун расмий ачылышында Мамыржан Рахимов бул иш-чара ар кыл улуттун жаштарын бириктирген достуктун аянтчасы болорун белгиледи. Куттуктоо сөзү менен Жогорку Кеңештин депутаты Бурул Аманова жана район акими Болоткан Баяке уулу да чыгышты.
Белгилей кетсек, форумдун алкагында буга чейин Кадамжай жана Кызыл-Кыя шаарларында футбол, волейбол боюнча спорттук мелдештер, жаш ишкерлер үчүн бизнес-форум жана “Акылман ордо” интеллектуалдык оюну өткөн. Ошондой эле иш-чаранын жүрүшүндө 2000дей айым катышкан чуркоо марафону уюштурулду.
Иш-чара БУУнун Тынчтык куруу фондунун жана Эл аралык миграция уюмунун колдоосу менен өткөрүлүп жатат. Майрамдык салтанат гала-концерт менен уланат.
