Бишкек, 09.06.26. /Кабар/. Бүгүн Баткен шаарында "Инвестициялык вектор: аймактардын мүмкүнчүлүктөрү жана туруктуу өнүгүү" аттуу аймактык семинар башталды.
Инвестициялар боюнча улуттук агенттиктен билдиришкендей, семинар аймактын экономикалык мүмкүнчүлүктөрүн арттырууга багытталган.
Президент Садыр Жапаровдун аймактардын инвестициялык жагымдуулугун жогорулатуу тапшырмасынын алкагында уюштурулган бул иш-чара БУУнун Өнүктүрүү программасы тарабынан колдоого алынды.
Иш-чаранын башкы максаты Баткен облусунун бизнес-чөйрөсүн колдоо, инвесторлор үчүн заманбап мамлекеттик жеңилдиктерди тааныштыруу жана жергиликтүү ишкерлер менен мамлекеттин ортосундагы түз кызматташтыкты чыңдоо болуп саналат.
Семинарда жакын арада кубаттуу курал катары «Инвестициялар» автоматташтырылган жаңы маалыматтык тутуму ишке киргизилери айтылды. Мындан тышкары, аймакка акча салууга тоскоол болуп жаткан бюрократиялык жана инфраструктуралык факторлорду толук жоюу талкууланып, мамлекет менен ишкерлер биргеликте ишке ашыра турган ири долбоорлор тааныштырылды.
Иш-чаранын жыйынтыгында Баткен облусунда ишкердик жүргүзүү шарттарын жакшыртуу боюнча атайын сунуштардын пакети иштелип чыкты.
Семинар 11-июнга чейин уланып, кийинки этаптары Ош жана Манас шаарларында өткөрүлөт.
