Бишкек, 06.04.25. /Кабар/. Күн мурун Баткен облусунун Кадамжай районунда 1000ден ашуун айым катышкан жай чуркоо иш-чарасы болуп өттү. Бул тууралуу президенттин Баткен облусундагы өкүлчүлүгүнүн басма сөз кызматы билдирет.
Маалыматка ылайык, айымдар арасында сергек жашоо образын калыптандырууну демилгелеген Венера Нусуратиллаева баштаган жергиликтүү активисттердин, айымдарды таң эрте чуркоого болгон чакырыгы 1000ден ашуун айымдын башын бириктире алды.
Айымдардын аракети Кадамжай райондук мамлекеттик администрациясы тарабынан да колдоого алынып, Баткен жана Ош облусунан чогулган айымдар, тазалык, ден соолук, ынтымак үчүн марафонго катышты. Анда алар 6,5 чакырым аралыкка чуркашты.
Иш-чарага президенттин Баткен облусундагы ыйгарым укуктуу өкүлүнүн орун басары Жаныбек Исаков да катышып, облус башчысы Айбек Шаменовдун куттуктоосун окуп, сыйлыктарын тапшырды.
Жаныбек Исаков өз сөзүндө "Дени сак аял, дени сак улут" деп белгилеп, облус башчысы сергек жашоого умтулган айымдардын демилгесин колдоого аларын айтып, коомду алга сүрөгөн айымдарга ыраазычылык билдирди.
