Бишкек, 09.06.26. /Кабар/. Баткен районунун Жаңы Достук айылында 225 орундуу мектеп курулууда.
Курулуш, архитектура жана турак жай-коммуналдык чарба министрлигинен билдиришкендей, объект республикалык бюджеттин эсебинен каржыланып, анын жалпы наркы 197 млн сомду түзөт.
Башкы планга ылайык, жалпы аянты 1 938 чарчы метр болгон төрт блоктон турган имарат салынат. Анда эки кабаттуу окуу корпусу, жыйындар залы, ашкана жана бардык шарттары каралган спорт залы болот. Мындан тышкары, жайкы волейбол, баскетбол жана футбол үчүн атайын аянтчалар каралат.
"Курулуш-монтаждоо иштери белгиленген графикке ылайык жүргүзүлүп, объекттин курулушу Турак жай-жарандык курулуш департаменти тарабынан көзөмөлдөнүүдө", - деп айтылат маалыматта.
