Бишкек, 29.09.25. /Кабар/. Бүгүн, 29-сентябрда Кыргызстан президентинин Баткен облусундагы ыйгарым укуктуу өкүлү Айбек Шаменов жана Тажикстандын Согди облусунун аткаруу бийлигинин төрагасы Раджоббой Ахмадзода кыргыз-тажик чек арасында жолукту.
Баткендеги өкүлчүлүктөн билдиришкендей, жолугушууга чектеш райондордун акимдери, облустук күч түзүмдөрүнүн жетекчилери да катышты.
Облус башчылары жолугушууда кыргыз-тажик мамлекеттик чек арасын делимитациялоонун жыйынтыгы менен, эки тараптан тең алмашуу макулдашылган айыл аймактардын тургундарын көчүрүүгө байланыштуу маселелерди, чек араны демаркациялоодо, чек ара сызыгын, короо жай, бак дарактардан, коммерциялык объекттерден тазалоо иштерин жүргүзүү, эл арасында түшүндүрүү иштерин алып баруу боюнча маселелер талкууланды.
Ошондой эле чек ара аймактарындагы коомдук коопсуздукту сактоо, жергиликтүү тургундардын ортосунда жакын кошуналык мамилелерди чыңдоо, ар тараптуу кызматташууну жакшыртуу багытында иш аракетерди улантуу макулдашылды.
