Бишкек, 21.07.25. /Кабар/. Баткен шаарынын өнөр жай зонасында 110/35/10кВ "Суу Башы" жаңы көмөк чордонунун курулушуна мезгил кутусу салынды.
Президенттин Баткен облусундагы өкүлчүлүгүнөн билдиришкендей, аталган объект , Баткен электр тармактар ишканасы менен Баткен шаардык мэриясы тарабынан курулууда.
Объекттин курулушуна шаардык мэрия тарабынан 1 гектар жер аянты жана 35 млн сом акча каражаты ажыратылып, жабдуулар алынып келди. Аталган каражат республикалык бюджеттен Баткен облусун өнүктүрүүгө багытталган 500 млн сомдун эсебинен каржыланды. Калган каражат "КУЭТ" ААК тарабынан каралган.
Көмөкчү чордондун курулушу менен Жаңы Баткен шаарына, Жаңы Достук айылына, Баткен шаарынын өнөр жай аймагына, жаңы стадионго электр энергиясы жеткирилет.
Белгилей кетсек, иш-чарага энергетика министри Таалайбек Ибраев, Баткен облусунун башчысы Айбек Шаменов, шаар мэри Темирболот Абыкеев катышты.
