Бишкек, 14.02.25. /Кабар/. Президенттин Баткен облусундагы өкүлү Айбек Шаменов Самаркандек айыл аймагынын эли менен жолукту.
Өкүлчүлүктөн билдиришкендей, айыл эли алгач эле сугат суу көйгөйүн чечип берүүнү суранышты. Социалдык объектилерге болгон муктаждык, үч нөөмөт менен иштеп жаткан Жаңы-Бак айылындагы мектеп жана бала бакча маселеси дагы көтөрүлдү.
Ошондой эле жаңы конуштардын инфратүзүмүн жакшыртуу зарылчылыгын жана айлана-чөйрөнүн тазалыгын сактоо үчүн таштанды жыйноочу унаа менен камсыздоо зарыл экенин айтышты.
Мындан тышкары, ипотекалык үйлөр боюнча маалымат ала албай жатышканын, Баткенге мамлекеттик ипотекалык компаниянын кеңсесин ачуу керектигин белгилешти.
Облус башчысы аймактын социалдык, экономикалык муктаждыгын чечүү багытында айтылган бардык маселелерди чечүү боюнча иш алып барылаарын айтып, элди биримдикте болуп, аймактагы муктаждыктарды чечүүгө салым кошууга, тартипти жана тазалыкты сактоого чакырды.
