Бишкек, 01.04.26. /Кабар/. Баткен облусунда быйыл 150 чакырымдан ашык жол оңдоо пландалууда. Бул тууралуу "Кабар" агенттигинин "Элден собол" берүүсүндө Транспорт жана коммуникациялар министрлигинин Автомобиль жолдору башкармалыгынын башчысы Асылбек Чойбеков билдирди.
Анын айтымында, аймактагы негизги объектилердин бири Миң-Өрүк — Самаркандек унаа жолу болуп саналат, учурда мында иштер тездетилген темп менен жүрүүдө. Мындан тышкары, стратегиялык мааниге ээ Төрт-Көчө тилкесинде да жол курулушу уланууда.
"Даярдык этаптары март айында аяктаган, бүгүнкү күндө курулуш иштери активдүү фазага өттү", — деп белгиледи Чойбеков.
Башкармалыктын башчысы өлкө боюнча масштабдуу пландарга да токтолду. Анын айтымында, 2026-жылы бүткүл Кыргызстан боюнча жалпысынан 1600 чакырымдан 1700 чакырымга чейинки унаа жолун куруу жана оңдоо пландаштырылууда.
