Бишкек, 03.10.25. /Кабар/. Башкы прокурор Максат Асаналиев бүгүн, 3-октябрда Армениянын Ереван шаарында өткөн КМШга мүчө мамлекеттердин коррупцияга каршы аракеттенүү боюнча Мамлекеттер аралык кеңешинин кезектеги жыйынына катышты.
Башкы прокуратурадан билдиришкендей, жыйында регионалдык өз ара аракеттенүүнү чыңдоо, прокуратуралык көзөмөлдүн натыйжалуулугун жогорулатуу, эл аралык кызматташтыкты өнүктүрүү жана мыкты тажрыйбаларды алмашуу маселелери каралды.
Башкы прокурор өз сөзүндө бизнес субъектилерин коррупциялык тобокелчиликтерден коргоонун механизмдерин түзүүнүн маанилүүлүгүн белгилеп, Кыргызстанда прокуратуранын ишмердүүлүгүн санариптештирүү жана ишкерлердин укуктарын коргоо боюнча чаралар ишке ашырылып жатканын айтты.
Иш-чаранын алкагында Максат Асаналиев Армениянын башкы прокурору А. Вардапетян менен эки тараптуу жолугушуу өткөрдү. Тараптар ведомстволор ортосундагы кызматташтыкты өнүктүрүүнүн келечектерин талкуулап, коррупцияга каршы аракеттенүү, кадрларды даярдоо жана биргелешкен демилгелерди ишке ашыруу маселелерине өзгөчө көңүл бурушту.
