Бишкек, 22.05.25. /Кабар/. Бүгүн, 22-майда башкы прокурор Марат Асаналиев Европа Коопсуздук жана Кызматташтык Уюмунун (ЕККУ) Улуттук азчылыктардын иштери боюнча жогорку комиссары Кристоф Камп менен жолугушту.
Прокуратурадан билдиришкендей, жолугушуунун жүрүшүндө тараптар укуктун үстөмдүгүн камсыздоо, адам укуктарын жана эркиндиктерин коргоо, ошондой эле улуттар аралык кастыкты жана экстремизмди алдын алуу багытында кызматташуунун актуалдуу маселелерин талкуулашты.
Тараптар өлкөдөгү укук тартибин жана этностор аралык ынтымакты чыңдоодо өз ара аракеттенүүнүн маанилүүлүгүн белгилешип, ЕККУ менен өнөктөштүктү мындан ары кеңейтүүнүн, адам укуктарын коргоо жаатында жаңы демилгелерди ишке ашыруунун зарылдыгына токтолушту.
Жолугушуунун алкагында Кыргыз Республикасынын укук коргоо органдарынын потенциалын жогорулатууга багытталган биргелешкен долбоорлорду иштеп чыгуу жана ишке ашыруу боюнча макулдашууга жетишилди.
Тараптар кызматташуунун мындан ары өнүгүшү укук коргоо органдарынын ишинин натыйжалуулугун жогорулатууга, туруктуулукту бекемдөөгө жана мамлекеттин бардык жарандарынын укуктарын камсыздоого өбөлгө болоруна ишенимин билдиришти.
