Бишкек, 03.04.25. /Кабар/. Бүгүн Жети-Өгүз районунда Барскоон – Каракол унаа жолун реконструкциялоого старт берилди.
Иш-чарага транспорт жана коммуникациялар министри Абсатар Сыргабаев, президенттин Ысык-Көл облусундагы өкүлү Бакытбек Жетигенов, Азия өнүктүрүү банкынын өкүлдөрү жана Жети-Өгүз райондук мамлекеттик администрациясынын башчысы, жергиликтүү тургундар катышты.
Министр Сыргабаев бул долбоор — Ысык-Көл облусунун транспорттук инфраструктурасын өнүктүрүүгө багытталган маанилүү кадам экенин белгилеп, төмөндөгүлөргө токтолду.
"Ысык-Көл айланма жолунун жалпы узундугу 440 чакырымды түзөт. Бүгүнкү күндө дээрлик 365 чакырымды түзгөн участокторунда каржы булактары аныкталып, 333 чакырымында реконструкция иштери жүрүп жатат. Президент Жапаров Садыр Жапаровдун колдоосу менен бул долбоордук участокту каржылоо маселеси чечилип, бүгүнкү күндө курулуш иштери башталганы турат. Долбоор — Ысык-Көл облусунун транспорттук инфраструктурасын өнүктүрүүгө багытталган маанилүү кадам.
II техникалык категорияга ылайык иштелип чыгып, учурдагы эки тилкелүү жол төрт тилкелүү болуп кеңеет. Ошондой эле, тротуарларды, жөө жүргүнчүлөр үчүн жер алдындагы өтмөктөрдү, көпүрөлөрдү реконструкциялоо, лотокторду куруу жана калктуу конуштарда көчөлөрдү жарыктандыруу каралган.
Мындан сырткары, аталган долбоордун ишке ашырылышы Ысык-Көл облусунун тургундары үчүн коопсуз жана ыңгайлуу жол шарттарын түзүп, туризмди өнүктүрүүгө жана экономикалык өсүшкө өбөлгө болот.
Башкы подрядчы катары Борбор Азияда жана башка көптөгөн мамлекеттерде ири жолдорду жана көпүрөлөрдү куруп, өзүнүн ишенимдүүлүгүн далилдеген Кытайдын "Чайна Роуд энд Бридж Корпорэйшн" компаниясы тандалды",-деди министр Сыргабаев.
Белгилей кетсек, Ысык-Көл айланма жолунун Барскоон айылынан Каракол шаарына чейинки 141–216-чакырымдагы, узундугу 75 чакырым болгон тилкеси реконструкцияланат.
