Бишкек, 12.06.26. /Кабар/. Кыргызстанда стратегиялык мааниге ээ Барскоон – Бедел унаа жолунун курулушу кызуу жүрүүдө.
Транспорт жана коммуникациялар министрлигинен билдиришкендей, учурда узундугу 161 чакырымды түзгөн жолдун геодезиялык жана инженердик изилдөөлөрү толук аяктап, долбоордук документтери даяр болду.
Мындан тышкары, Сөөк жана Ашуу-Суу туннелдеринде казуу иштери жүрүп жатат. Эстакадалык көпүрөлөр үчүн пайдубал устундарын орнотуу иштери башталды. Ошондой эле курулушту жана элдин кыймылын жеңилдетүү үчүн Карасай дарыясына узундугу 60 метрлик убактылуу көпүрө курулуп, пайдаланууга берилди.
"Объектте бетон заводдору, майдалоо комплекстери жана убактылуу өндүрүштүк базалар ишке киргизилди. Керектүү техникалар жеткирилип, кошумча жабдууларды алып келүү уланууда. Жалпысынан 50дөн ашык көпүрө, 2 туннель жана башка коргоочу инфраструктуралык курулуштарды салуу каралган", - деп айтылат маалыматта.
Азыркы тапта курулушта 1 100дөн ашык жумушчу эмгектенүүдө, жакында алардын санын 1 500 – 2 500 адамга чейин көбөйтүү пландалууда.
Курулуш иштери бекитилген графикке ылайык туруктуу жүрүп жатат. Долбоордун негизги иштерин 2029-жылы аяктоо, ал эми жолду 2030-жылы пайдаланууга берүү пландалууда.
