Бишкек, 18.08.25 /Кабар/. Балыкчы - Барскоон - Каракол унаа жолунда ири металл конструкциясы колдонулууда. Бул тууралуу “Кыргыз жол курулуш” компаниясынын директору Бакыт Исмаилов билдирди.
Анын айтымында, аталган компанияга үч бөлүккө бөлүнгөн 75 чакырым жолду куруу тапшырмасы берилген: биринчиси – 25 чакырым, экинчиси – 46 чакырым жана үчүнчүсү – 5 чакырым.
“Биринчи тилкеде Кыргызстан үчүн ири металл конструкция — Россиядан алынып келинген гофрленген металл түтүк колдонулуп жатат. Анын узундугу 50 метрден, туурасы 12 метрден ашат, бийиктиги 7-8 метрге жетет. Бул конструкциянын астынан эки темир жол өтөт”, - деп белгиледи Исмаилов.
Мындан тышкары, долбоордо эки катмар асфальт төшөө каралган. Биринчи катмардын калыңдыгы 9 сантиметрди түзөт.
Эске салсак, буга чейин аталган жолдун 60 чакырымына асфальт-бетон төшөлмөсүнүн биринчи катмары ал эми 30 чакырымына экинчи катмар төшөлгөнү маалымдалган. Долбоорго төрт подряддык компания тартылган.
