Бишкек, 01.06.26. /Кабар/. Бүгүн, 1-июнь - Балдарды коргоонун эл аралык күнүнө карата президенттин Жалал-Абад облусундагы өкүлү Тилек Текебаев Манас шаарындагы балдардын психоневрологиялык социалдык-стационардык мекемесинде тарбияланып жаткан балдарды куттуктады.
Өкүлчүлүктөн билдиришкендей, майрамдын алкагында ыйгарым укуктуу өкүлдүн демилгеси менен демөөрчүлөр тарабынан аталган мекемеге жалпы суммасы 300 миң сомду түзгөн гигиеналык жалаяктар (памперстер) тапшырылды. Бул жардам мекемедеги балдардын дээрлик бир жылдык муктаждыгын камсыздоого шарт түздү.
Тилек Текебаев көрсөтүлгөн колдоо үчүн демөөрчүлөргө ыраазычылык билдирип, коомдун аярлуу катмарындагы балдарга көмөк көрсөтүү үлгүлүү адамдык сапаттардын бири экенин кошумчалады. Ошондой эле балдарга бекем ден соолук, узак өмүр жана кең келечек каалады.
Белгилей кетсек, учурда Манас шаарындагы балдардын психоневрологиялык социалдык-стационардык мекемесинде ден соолугунун мүмкүнчүлүгү чектелген 156 бала тарбияланып келет.
