Бишкек, 08.04.25. /Кабар/. Кыргызстандын экономика жана коммерция министри Бакыт Сыдыков Өзбекстанга болгон иш сапарынын алкагында Ташкенттеги Кыргызстандын Соода өкүлчүлүгүнүн кеңсесинин ишмердүүлүгү менен таанышты жана өлкөлөр ортосундагы эки тараптуу кызматташтыкты чыңдоо боюнча пландарды иликтеди.
Министрликтен билдиришкендей, сапардын максаты соода-экономикалык өз ара аракеттенүүнүн учурдагы маселелерин талкуулоо жана товар жүгүртүүнү көбөйтүү үчүн стратегияларды иштеп чыгуу жана биргелешкен инвестициялык долбоорлорду ишке ашыруу болду.
Ошондой эле логистикалык инфраструктураны өнүктүрүүнүн жана Кыргызстан менен Өзбекстандын ишкерлери үчүн жагымдуу шарттарды түзүүгө өзгөчө көңүл бурулду.
Бакыт Сыдыков эки мамлекеттин профилдик түзүмдөрүнүн ортосундагы институционалдык өз ара аракеттенүүнү бекемдөө башкы маселелердин бири экенин баса белгиледи.
Ошондой эле министр кыргыз товарларын жана кызматтарын Өзбекстандын рыногуна мындан ары жылдыруу максатында соода өкүлчүлүгүнүн ишин активдештирүү зарылдыгын белгиледи, бул соода көлөмүн көбөйтүүгө жана биргелешкен экономикалык демилгелерди өнүктүрүүгө өбөлгө түзөт.
