Бишкек, 11.09.25. /Кабар/. Кыргыз мамлекеттик Бакен Кыдыкеева атындагы жаш көрүүчүлөр театры 2025-жылдын 14–19-сентябрь күндөрү Россиянын Рязань жана Петрозаводск шаарларында өтө турган "Рязанские смотрины" аттуу XX эл аралык театр фестивалдарына катышат.
Маданият министрлигинен билдиришкендей, театр белгилүү драматург, КР эл жазуучусу Кыялбек Иманалиевдин "Үмүт", жана Э.Шмидтин "Письмо Самолётик" спектаклдерин тартуулайт.
Белгилей кетсек "Үмүт" спектакли буга чейин Өзбекстан, Казакстанда өткөн Евразиялык I эл аралык театр фестивалдарына бир нече жолу катышып, жогорку баага татыган. 2025-жылдын 27-мартында Москвада өткөн “M.@rt.контакт” VII эл аралык театралдык жаштар форумунда бул спектакль чоң ийгиликке жетишкен. Башкы ролду аткарган КР эл артисти Назира Мамбетова "Эң мыкты аялдын образы", ал эми спектакль "Эң мыкты сценография" номинацияларын жеңип алган.
Ал эми "Письмо Самолётик" спектакли да эл аралык деңгээлде таанылып келет. Ал 2021-жылы Өзбекстанда өткөн фестивалда, 2023-жылы Москвадагы Чехов атындагы V эл аралык театр фестивалында, ошондой эле 2025-жылы Екатеринбург ТЮЗ театрынын чоң сахнасында коюлган.
