Бишкек, 25.11.25. /Кабар/. Азербайжан-Кыргыз өнүктүрүү фонду "Кулун" кичи ГЭСин каржылоону пландоодо. Бул тууралуу бүгүн фонддун өкүлдөрү Игбал Бабаев жана Замирбек Осмоновдун президенттин Ош облусундагы өкүлү Элчибек Жантаев менен болгон жолугушуусунда белгилүү болду.
Өкүлчүлүктөн билдиришкендей, жолугушууда тараптар фонд түзүлгөндөн берки кызматташтыкты жана социалдык, инфраструктуралык долбоорлордун жүрүшүн талкуулашты.
Ошондой эле Ошто кардио борборун куруу боюнча долбоорго кол коюлганы белгиленип, бул демилге аймактын саламаттыкты сактоо кызматын жакшыртууда маанилүү кадам экени айтылды. Мындан тышкары, фонд Кара-Кулжа районунда 6 МВтка чейинки "Кулун" кичи ГЭСин каржылоону пландап жатканы маалымдалды.
Элчибек Жантаев жаңы долбоорлорду илгерилетүүдө ар тараптуу колдоо көрсөтүүгө даяр экенин билдирди.
Тараптар кызматташууну мындан ары кеңейтүү жана биргелешкен аракеттер түштүк аймактардын өнүгүүсүнө олуттуу салым кошоруна басым жасашты.
