Бишкек, 15.01.26 /Кабар/. Австриянын Вена шаарында “Түрк жумалыгы” өттү. Эл аралык маданий иш-чара экинчи жолу өткөрүлүп жаткандыгын Маданият, маалымат жана жаштар саясаты министрлигинен билдиришти.
Иш-чарага маданият, маалымат жана жаштар саясаты министри Мирбек Мамбеталиев, Түрк тилдүү мамлекеттер уюмунун башкы катчысы Кубанычбек Өмүралиев, эл аралык уюмдардын өкүлдөрү, дипломатиялык миссиялардын жетекчилери жана уюмга мүчө мамлекеттердин диаспоралык мекемелери катышты.
Түрк мамлекеттер уюмуна мүчө өлкөлөрдүн маданият министрлеринин атынан Мирбек Мамбеталиев сөз сүйлөп, уюштуруучуларга ыраазычылык билдирди.
“Түрк жумалыгы” - түрк дүйнөсүнүн стратегиялык көз карашын, маданий баалуулуктарын жана көп тараптуу кызматташтыгын жайылтуу үчүн маанилүү платформа болуп саналат. Бул иш-чара эл аралык дипломатиялык байланыштарды бекемдөөгө жана маданий кызматташтыкты өнүктүрүүгө олуттуу салым кошот”,-деп белгиленет маалыматта.
