Бишкек, 03.04.25. /Кабар/. Бүгүн Бишкек шаарындагы Ататүрк атындагы сейил бакта 60тан ашык көчөт отургузулду.
Дин иштери боюнча мамлекеттик комиссиядан маалымдашкандай, иш-чара Европадагы коопсуздук жана кызматташтык Уюмунун (ЕККУ) Бишкектеги Программалык кеңсесинин жана Move Green экологиялык коомдук уюмунун өнөктөштүгү менен уюштурулду.
Көчөт отургузуу шаар инфраструктурасын жакшыртуу, айлана-чөйрөнү жашылдандыруу, ошондой эле конфессиялар аралык диалогду күчөтүү жана коомчулуктун дин жаатындагы маалымдуулугун жогорулатуу максатын көздөйт.
Бул демилге 2021–2026-жылдарга карата Кыргызстандын диний чөйрөдөгү мамлекеттик саясатынын концепциясын жана конфессиялар аралык кеңешинин иш-чаралар планын ишке ашыруунун алкагында өткөрүлдү. Анда президенттин администрациясынын саясий жана экономикалык изилдөөлөр башкармалыгынын начальнигинин орун басары Октябрь Капалбаев диндер аралык ынтымакты бекемдөөнүн жана биргелешкен долбоорлорду ишке ашыруунун маанилүүлүгүн белгиледи.
Иш-чара катышкан 100дөн ашуун мамлекеттик кызматкерлер жана ар түрдүү конфессиялардын өкүлдөрү Ататүрк паркына 60тан ашык көчөт отургузду.
Белгилей кетсек, 2018-жылы түзүлгөн Кыргызстандын конфессиялар аралык кеңеши учурда 17 диний уюмдун өкүлдөрүн бириктирип, конфессиялар аралык диалогду өнүктүрүү, диндерге урматтоо менен мамиле кылуу, толеранттуулук жана сабырдуулук принциптерин жайылтуу, ошондой эле радикалдашуунун алдын алуу максатында жыл сайын ондогон иш-чараларды өткөрүп келет.
