Бишкек, 29.10.26. /Кабар/. "Бишкекжашылчарба" муниципалдык ишканасынын "Жаңы үйлөнгөндөрдүн бак отургузуусу" долбоорунун алкагында жаш жубайлар "Адинай" сейил багына ольха дарагын отургузушту. Бул тууралуу мэриядан билдиришти.
Маалыматка ылайык, долбоорго катышууну каалаган жаңы үйлөнгөндөр https://greenair.kg/bishkek сайты аркылуу арыз бере алышат же 0880 005 123 телефонуна кайрылса болот. Ал үчүн бак отургузуучу жерди тандап, керектүү маалыматтарды толтуруп, QR-код аркылуу төлөм жүргүзүү зарыл.
"Отургузулган дарак сүйүүнүн, үй-бүлөлүк бакубаттуулуктун жана жубайлардын жашоосундагы жаңы этаптын символу болот. Ал жаш үй-бүлө менен бирге өсүп, алардын өмүрүндөгү өзгөчө күндү жана бирге баскан жолун эске салып турат", — деп айтылат маалыматта.
Мэрия жаш жубайларды долбоорго кошулуп, Бишкек шаарын жашылдандырууга өз салымын кошууга чакырат.
