Бишкек, 04.12.25. /Кабар/. Министрлер кабинетинин төрагасынын орун басары – суу ресурстары, айыл чарба жана кайра иштетүү өнөр жайы министри Бакыт Төрөбаев Москва районундагы BIOJEM компаниясынын өндүрүш процесси менен таанышты.
Ведомстводон маалымдашкандай, BIOJEM — тузсуз аквакультура үчүн профессионалдык тоюттарды чыгарган улуттук өндүрүүчү. Кыргызстандагы бул багытта иш алып барган 3-ишкана, заманбап экструзиондук жабдуулар менен толук циклдеги өндүрүшкө ээ болуп, жылына 35 миң тоннага чейин тоют чыгарууга мүмкүнчүлүк түзүлгөн.
Заводдун өзгөчөлүктөрү:
- автоматташтырылган экструзиондук линия, вакуумдук майлоо технологиялары;
- ар кандай балык түрлөрүнө ылайыкташкан рецептуралар;
- сапатты көзөмөлдөөнүн толук цикли — сырьё кабыл алуудан тартып даяр продукцияны таңгактоого чейин;
- заманбап жабдылган лаборатория;
- европалык жана азиялык адистер менен туруктуу технологиялык консалтинг.
BIOJEM продукциясынын ассортиментине форель, осетр, карп жана башка тузсуз суу балыктары үчүн тоюттар кирет. Тоюттар жогорку сиңиримдүүлүккө, балансташтырылган протеин, май, витамин жана минералдык курамга ээ.
Министр Бакыт Төрөбаев белгилегендей, Кыргызстанда аквакультура тармагын өнүктүрүүдө ата мекендик өндүрүштүн ролу өзгөчө маанилүү. Ички рынокту сапаттуу тоют менен камсыз кылуу жана экспортук потенциалды жогорулатуу — тармактын негизги багыттарынын бири.
