Бишкек, 12.01.25 /Кабар/. Нарын облусуна караштуу Ат-Башы районундагы жалпы билим берүү мекемелери кычыраган сууктан улам аралыктан окумай болушту. Бул тууралуу “Кабар” агенттигине Ат-Башы районунун акиминин орун басары Венера Мурзалымбекова билдирди.
Ал белгилегендей, бүгүн райондо термометр -31-32 градусту көрсөткөн.
“Ат-Башы районунда жалпы 20 мектеп бар. Бүгүн тийиштүү мекемелердин катышуусунда штабдык отурум өткөрүлүп, анын негизинде балдарды 19-январга чейин аралыктан окутуу чечими кабыл алынды.
Райондук билим берүү бөлүмүнүн берген маалыматына ылайык, бүгүн окуу башталып, бирок көптөгөн окуучулар кечигип, аз санда гана келишкен”,-деп билдирди орун басар.
