Бишкек, 04.07.25. /Кабар/. Ат-Башы районун Ача-Кайыңды айылынын тургуну, учурда Түштүк Кореяда эмгектенип жаткан Чынгыз Кудус уулу өз демилгеси менен райондук ооруканага тез жардам унаасын белек кылды. Бул тууралуу райондук администрациядан билдиришти.
Тез жардам унаасын тапшыруу аземине аким Эмилбек Абдыкадыров, оорукананын директору Азим Ажыбек уулу, медициналык кызматкерлер жана айыл тургундары катышып, демөөрчү жигитке терең ыраазычылык билдиришти.
Медиктер бул белек алардын жумушун жеңилдетип, элге ыкчам жана сапаттуу жардам көрсөтүүгө жол ача турганын белгилешти.
Ат-Башы райондук жетекчилиги жана жалпы медицина кызматкерлери Кудус уулуна ыраазычылык билдирип, анын ишине ийгиликтерди каалашты.
