Бишкек, 30.07.25 /Кабар/. Ат-Башы ГЭСинде күз-кыш мезгилине даярдык иштери жүрүүдө. Бул тууралуу Энергетика министрлигинен билдиришти.
Аталган ГЭС 2022-жылы толук реконструкциядан өткөн, учурда 2025-2026-жылдардагы күз-кыш мезгилине карата алдын ала жана системдүү даярдык иштери жүргүзүлүүдө.
2025-жылы графикке ылайык ийгиликтүү аткарылган иштер:
- №1 жана №2 гидроагрегаттардын учурдагы ремонту;
- №1 трансформатордун текшерүү-тейлөө иштери;
- 110 кВ жана 10 кВ бөлүштүрүүчү түзүлүштөрдүн элементтери боюнча иштер.
Жакынкы күндөрү төмөндөгүдөй иштер башталат:
- №3 жана №4 гидроагрегаттардын учурдагы ремонту;
- SFF-28000/115 үлгүсүндөгү №2 трансформатор;
- 110/10 кВ электр чөйрөсүндөгү негизги линиялар жана жабдуулар.
Подряддык уюмдардын катышуусунда аяктаган долбоорлор:
- СЭВ (суунун өткөрүүчү вентили) жогорку сводунун калыбына келтирилиши;
- эксплуатациялык сууну таштоочу (водосброс) түзүлүштүн I этабы;
- административдик имараттагы эшиктердин жаңыланышы.
Сууну таштоочу гидротехникалык түзүлүштүн кийинки этаптагы ремонту жылдын IV кварталына пландалган. Убактылуу токтотуу суу сактагычты технологиялык тазалоо муктаждыгына байланыштуу болуп саналат.
Реконструкциядан кийин ГЭСтин бардык жабдуулары жогорку техникалык стандарттарга жооп берет. Ошондуктан учурда аткарылып жаткан иштер эксплуатациялык талаптарга ылайык пландуу профилактикалык мүнөздө жүрүүдө.
Ат-Башы ГЭСи Нарын облусунун электр энергиясына болгон муктаждыгынын 25 пайызга чейинки бөлүгүн жабат. Кыш мезгилинде электр жүктөмү жай мезгилине салыштырмалуу 4,36 эсеге жогорулайт.
