Бишкек, 01.10.26. /Кабар/. Араван районунун Керме-Тоо айыл аймагындагы Кичик-Алай айылынын окуучуларын мектепке ташуу маселеси чечилди.
Президенттин Ош облусундагы өкүлчүлүгүнөн билдиришкендей, алар эми мектепке атайын кичи автобус менен жеткирилет.
Буга чейин айрым окуучулар мектепке баруу үчүн 9 чакырымга чейин жөө басып барышкан. Маселени чечүү үчүн Араван райондук өнүктүрүү фондунан 1,5 млн сом бөлүнүп, өткөрүлгөн тендердин жыйынтыгында 1,4 млн сомго 20 орундуу кичи автобус сатып алынган.
Мындан тышкары, Керме-Тоо айыл өкмөтүнө Дүйнөлүк банктын АРИС программасынын алкагында 3,5 млн сомдук экскаватор жана 3,5 млн сомдук ассенизатор берилди.
Жалпысынан айыл өкмөтүнүн балансына 8,4 млн сомдук үч техника өткөрүлүп берилди. Техника 27 чакырым аралыктан тартылган таза суу тутумун тейлөөгө жана оңдоп-түзөө иштерине да пайдаланылат.
