Бишкек, 05.05.26. /Кабар/. Араван районунда селдин кесепетинен кийин санитардык-эпидемиологиялык коопсуздук камсыз кылынууда. Бул тууралуу президенттин Ош облусундагы өкүлчүлүгүнөн билдиришти.
Белгилей кетсек, 3-майда Маданият, Пахта-Дөбө айылдарында жана Бостон айылында катуу жааган жаандан улам сел жүрүп, 21 турак үйдүн короо-жайын, 10 ажаткананы, 1 мектептин жана 1 бала бакчанын короосун суу каптаган.
Райондун тиешелүү кызматтары (жергиликтүү бийлик, ӨКМ, жол тейлөө ишканасы, СЭЦ) тарабынан тазалоо иштери ыкчам жүргүзүлүп, 4-май күнү толугу менен аяктады. Учурда Маданият айылында ички жолдор, арыктар жана сел каналдары калыбына келтирилүүдө.
Кырсыктын кесепеттерин жоюу жана жугуштуу оорулардын алдын алуу максатында райондук Санитардык-эпидемиологиялык кызмат активдүү иш алып барууда. Алар 50 кг ГСА жана 100 даана "Хлорапин" дезинфекциялоочу каражаттарын колдонуп, залалсыздандыруу иш-чараларын жүргүзүштү. Мындан тышкары, 62 турак үй кыдырылып, санитардык-гигиеналык талаптарды сактоо боюнча түшүндүрүү иштери жүргүзүлүүдө.
Суу түтүктөрү жабыркаган эмес. Ичүүчү суунун сапаты текшерилип, бардык чекиттерден алынган үлгүлөр боюнча олуттуу терс белгилер аныкталган жок. Учурда район боюнча эпидемиологиялык абал туруктуу жана көзөмөлдө.
