Бишкек, 02.06.25. /Кабар/. Ош шаарында А.Навои атындагы сейил багынын бир бөлүгүнө жаңы эс алуучу жайдын курулушу аяктоо алдында турат.
Шаардык мэриядан билдиришкендей, буга чейин кароосуз калган О. Акимбаев көчөсүн бойлой «Ферас» бассейнинен парктын өзүнө чейинки бөлүгүндө курулуш иштери жүргүзүлүүдө.
Маалым болгондой, жаңы аймакта амфитеатр, насостук аянтча, скейт-парк, воркаут аянтчасы, балдар ойноочу аянтчалар, сейилдөө үчүн аянтчалар жана фонтандар болот.
Муну менен катар, аймакты жакшыртуу жана жашылдандыруу иштери да жүрүп жатат.
«Жакынкы аралыкта бардык иштер бүткөрүлүп, эс алуу зонасы шаар тургундары үчүн жеткиликтүү болот деп күтүлүүдө», - деп айтылат маалыматта.
