Бишкек, 20.08.25 /Кабар/. 15-17-август күндөрү Казакстандын Алматы шаарында аккредитилген дипломатиялык өкүлчүлүктөрдүн, эл аралык уюмдардын жана массалык маалымат каражаттарынын өкүлдөрү үчүн Ысык-Көлдүн тескей жээгиндеги маданий жана туристтик жайлары менен "Мурас-2025" таанышуу сапары өткөрүлдү.
Тышкы иштер министрлигинен билдиришкендей, таанышуу сапары Кыргызстандын Алматы шаарындагы Башкы консулдугу тарабынан уюштурулду.
Бул демилге Ысык-Көл облусунун туристтик мүмкүнчүлүктөрүн илгерилетүүгө, маданий-гуманитардык өз ара аракеттенүүнү чыңдоого, туризм тармагындагы эл аралык кызматташууну өнүктүрүүгө жана аймактын бай маданий мурасын таанытууга багытталган.
Үч күндүк турдун жүрүшүндө катышуучулар Ысык-Көлдүн тескей жээгиндеги тарыхый жана туристтик жайлар менен таанышты. Программага улуттук тамак-аш тартуулоо, кыргыз элинин тарыхы жана салттары менен таанышуу камтылган.
Мындан тышкары, Каракол шаарынын жана райондордун жетекчилери, жергиликтүү дестинациялар менен жолугушуулар болуп, анда Ысык-Көл облусу менен Казакстан, Польша, Австрия, Чехия, Монголия, Нигерия жана Германия менен соода-экономикалык, инвестициялык, маданий жана туристтик кызматташтыгынын келечеги талкууланды.
