Бишкек, 25.11.25. /Кабар/. Аламүдүндө мыйзамсыз курулуштар аныкталып, 400 миң сом айып салынды. Бул тууралуу Курулуш, архитектура жана турак жай-коммуналдык чарба министрлигинен билдиришти.
Маалыматка ылайык, инспекторлор Аламүдүн райондук прокуратурасынын көрсөтмөсүнүн негизинде Кара-Жыгач айылындагы "Чопо-Таш" жана "Нурлион Бетон" ЖЧКлары тарабынан курулуп жаткан бетон түйүндөрүнө пландан тышкаркы текшерүү жүргүзгөн.
Анын жүрүшүндө аталган объектилерде талапка ылайык долбоордук-уруксат берүүчү документтердин жоктугу, ошондой эле компетенттүү органдар менен зарыл болгон макулдашуулары жок экендиги аныкталган
Натыйжада административдик чаралар көрүлүп, эки ЖЧКнын ар бирине 200 миң сомдон, жалпы 400 миң сом өлчөмүндө айып пул салынды.
Мындан сырткары, аныкталган бетон түйүндөрдүн иши мыйзам бузуулар толугу менен жоюлганга чейин токтотулду.
Кошумчалай кетсек, аталган факты боюнча өз алдынча курулган объектилерди бузуу жөнүндө сотко доо арызы да берилди.
