Бишкек, 25.08.25. /Кабар/. Аламүдүн районуна карашту Таш-Дөбө айылындагы мектеп 60 жылдан кийин капиталдык оңдоп-түзөөдөн өттү. Бул тууралуу Курулуш, архитектура жана турак-жай коммуналдык чарба министрлигинен билдиришти.
Маалыматка ылайык, билим берүү уюму толук жаңыртылып окуу жылдын башталышы менен пайдаланууга берилет.
Мектеп 1400 орунга ылайыкталып, окуучулар үчүн бардык шарттар каралды. Капиталдык оңдоо иштери республикалык бюджеттин эсебинен каржыланып, тендердик баасы 173 млн сомду түздү.
Белгилей кетсек, мектептин биринчи корпусу 1964-жылы, ал эми экинчи корпусу 1984-жылы курулуп, андан бери капиталдык оңдоодон өткөн эмес.
