Бишкек, 09.07.25. /Кабар/. Аламүдүн районунун Таш-Дөбө айылындагы 1400 орундуу мектеп капиталдык оңдоп-түзөөдөн өткөрүлүүдө. Бул тууралуу Курулуш, архитектура жана турак жай-коммуналдык чарба министрлигинен билдиришти.
Күн мурун Турак жай жарандык курулуш департаментинин директору Ислан Момоконов
мектепте жүргүзүлүп жаткан иштер менен жеринде таанышты.
Белгилей кетсек, мектептин биринчи окуу корпусу 1964-жылы, экинчи корпусу 1984-жылы курулган. Жалпы 1400 орунга ылайыкталган билим берүү мекемесинде учурда 1200дөн ашуун окуучу билим алып келет.
Капиталдык оңдоп-түзөө иштери 2024-жылы республикалык бюджеттин эсебинен башталып, тендердик баасы 173,6 млн сомду түзгөн. Бүгүнкү күндө оңдоо иштеринин 70 пайызы бүткөрүлдү, жыл аягына чейин мектепти толук бүтүрүп, пайдаланууга берүү пландалууда.
