Бишкек, 23.05.26. /Кабар/. "Ак-Булак" курорттук шаарчасынын курулушун баштоого карата даярдыктар көрүлө баштады. Бул тууралуу "Ала-Тоо Резорт" ААКтан билдиришти.
Бул "Жыл бою иштей турган "Ала-Тоо Резорт" тоо кластери" мамлекеттик долбоорунун экинчи этабын ишке ашыруунун алкагында жүргүзүлүүдө.
Учурда "Ала-Тоо Резорт" ААКтын өкүлдөрү INPUT жана Doppelmayr австриялык компанияларынын адистери менен биргеликте келечектеги курорттук шаарчанын аймагында көчмө жумушчу кеңешмелерди өткөрүүдө.
"Аймакка комплекстүү баа берүү, мындан аркы долбоорлоо жана инфраструктураны өнүктүрүүнүн негизги багыттары аныкталууда", - деп айтылат маалыматта.
Мындан тышкары, INPUT жана Doppelmayr компанияларынын эксперттери долбоордун жалпы мастер-планынын алкагында келечектеги "Ак-Булак" курорттук шаарчасынын концепциясын иштеп чыгып, даярдашат.
