Бишкек, 20.06.25. /Кабар/. Ала-Тоо аянтындагы Манастын айкели бийиктейт. Бул тууралуу бүгүн, 19-июнда Бишкек шаарынын мэри Айбек Жунушалиев өткөргөн көчмө жыйында белгилүү болду.
Мэриядан билдиришкендей, көчмө жыйындын жүрүшүндө оңдоп-түзөө иштери жүрүп жаткан эки маанилүү объект текшерилди. Белгиленгендей, Ала-Тоо аянтында Манас эстелигинин астыңкы бөлүгү оңдолуп жатат. Учурда эстеликти жаап турган плита, эстеликтин өзү жана астыңкы пайдубал алынып салынды. Долбоордук документтерге ылайык, эстеликтин бийиктиги 22,7 метрди, туурасы 6,2 метрди түзүп, жогору көтөрүлгөн сайын акырындык менен 2,5 метрге чейин ичкерилет. Белгиленгендей, эстелик 10,3 метр бийиктикти түзөт. Капиталдык курулуш башкармалыгына курулуш иштеринин сапатын жана белгиленген мөөнөттөрдүн сакталышын катуу көзөмөлдөө тапшырылды.
Анжан соң Тоголок Молдо көчөсүндө жайгашкан Дөлөн Өмүрзаков атындагы кичи спорттук арена текшерилди. Бул спорттук имарат 5000 көрүүчүгө ылайыкталган жана жер төлөлөрү бар. Эки кабаттуу имараттын жалпы аянты 15 342 чарчы метрди түзөт. Бүгүнкү күндө металл конструкциялар толугу менен орнотулуп бүттү, ошондой эле сэндвич-панелдерди орнотуу жана ички электр чубалгыларын тартуу иштери жүргүзүлүүдө. Биринчи Май райондук акимиатына бул курулуш ишинин жүрүшүнө көзөмөлдү күчөтүү тапшырмасы берилди.
