Бишкек, 05.09.25. /Кабар/. Ала-Бука районундагы маданий жайлар жаңыланууда. Бул тууралуу Маданият, маалымат жана жаштар саясаты министрлигинен билдиришти.
Бүгүн Жогорку Кеңештин төрагасы Нурланбек Тургунбек уулу жана маданият министринин биринчи орун басары Союзбек Надырбеков аймактагы оңдоп-түзөө иштери менен таанышты.
Алар алгач Ш.Жоробекова атындагы маданият үйүндө жүргүзүлгөн оңдоп-түзөө иштеринин абалы менен таанышты. Аталган мекеме 4,5 млн сомдон ашуун каражатка реконструкцияланды.
Ошондой эле төрага жана министрдин биринчи орун басары Сафед-Булан айылындагы "Шах-Фазиль" мамлекеттик тарыхый-маданий корук музейинин дирекциясынын жаңы административдик имаратынын ачылыш аземине катышты.
Имараттын курулушу 2023-жылы башталып, ага жалпысынан 27 млн сом каражат бөлүнгөн. Сапардын алкагында Шах-Фазиль эстелиги менен да таанышып, анын архитектуралык жана көркөмдүк өзгөчөлүктөрү өткөн доордун өрнөктүү мисалы гана эмес, ыйык жайлардын бири экендиги белгиленди. Зыярат кылуу учурунда күмбөздө куран окулду.
