Бишкек, 11.03.26. /Кабар/. Ала-Бука районунда 6 айылды ичүүчү таза суу менен камсыздай турган таза суу системасы курулууда. Бул тууралуу президенттин Жалал-Абад облусундагы өкүлчүлүгүнөн билдиришти.
Атап айтканда, Төлөкө, Сары-Колот, Бирлешкен, Теңги, Кош-Болот жана Көк-Серек айылдары таза суу менен камсыз болот.
Долбоордун тендердик баасы 210 млн 115 миң сомду түзөт. Курулуш иштерин "АСТАС строй" ЖЧКсы жүргүзүп, жумуштар 2020-жылы башталган.
Күн мурун облус башчысы Тилек Текебаев таза суу системасынын курулуш иштеринин жүрүшү менен таанышты.
Ал курулуш иштеринин учурдагы абалын жеринен көрүп, долбоорду өз мөөнөтүндө жана сапаттуу бүтүрүү зарылдыгын белгиледи.
Ошондой эле курулуш иштерине керектүү каражаттарды толук камсыздоо боюнча тиешелүү тапшырмаларды берди.
