Бишкек, 17.07.25. /Кабар/. Ала-Бука райондук электр тармактарынын имараты капиталдык оңдон-түзөөдөн кийин пайдаланууга берилди. Бул тууралуу Энергетика министрлигинен билдиришти.
Маалыматка ылайык, ачылыш аземине министр Таалайбек Ибраев жана Жогорку Кеңештин депутаты Азизбек Турсунбаев жана "Кыргызстан улуттук электр тармактары" ААКтын башкы директору А.Рысбеков катышты.
Аталган имарат 1989-жылы курулуп, эскилиги жеткендиктен
2024-жылы "КУЭТ" ААК тарабынан 5,1 млн сом каражат бөлүнүп, Жалал-Абад электр тармактар ишканасынын капиталдык курулуш планына киргизилген. Бүгүн толугу менен капиталдык оңдоп-түзөөдөн өткөрүлүп бүттү.
Жаңыланган имаратта жумушчулар үчүн иштөө ыңгайына жараша шарт түзүлүп, диспетчердик бөлмөгө заманбап LED- экран коюлган. Мында кызматкерлер аралыктан башкарып, кайсы аймакта жүктөм көп болуп жатканын жана өчүрүү болгонун ыкчам аныктай алат.
Министр Ала-Бука райондук электр тармактарынын кызматкерлеринин жумушун жеңилдетүү максатында JAG үлгүсүндөгү бир даана бригадалык унаа тапшырды.
